| Original Title | Dialect | Informant | Genre Form | Genre Content | ID | glossed | Audio |
|---|---|---|---|---|---|---|---|
| mosʲneː jeɣpiɣketeːntəl oːleɣ kit koləl. […] | northern mansi (NM) | Tasmanov, Jakov Nikolajev; Pakin, Semeon | mixed (mix) | Mythological Texts (myt) | 793 | – | – |
| Text Source | Editor | Collector |
|---|---|---|
| Kannisto, Artturi / Liimola, Matti. 1956. Wogulische Volksdichtung I, pp. 250-263 | Liimola, Matti | Kannisto & Liimola (KL) |
| English Translation | German Translation | Russian Translation | Hungarian Translation |
|---|---|---|---|
| "A Moːsʲ-Woman, a Moːsʲ-Man and a Bear" | "Eine Moːsʲ-Frau, ein Moːsʲ-Mann und ein Bär" | – | – |
| by Kannisto, Artturi |
| Citation |
|---|
| Kannisto & Liimola: OUDB Northern Mansi Corpus. Text ID 793. Ed. by Janda, Gwen Eva. http://www.oudb.gwi.uni-muenchen.de/?cit=793 (Accessed on 2024-11-22) |
| mosʲneː jeɣpiɣketeːntəl oːleɣ kit koləl. […] |
| mosʲneː jeɣpiɣketeːntəl oːleɣ kit koləl. xosa oːlssiɣ waːtʲi oːlssiɣ, jeɣpiɣe toːrəm waːrəm xoːtal matər saɣri ta saɣri. akʷ xoːtaliɣ jeːmtəs, jeɣaːɣite tumajti: „jeɣpiɣm manər saɣri?“ jeɣpiɣe minas woːrən. taw minas jeɣpiɣe kolən. juwsʲaltəs, sunsite: xasapsaiŋ paːl! tuː minas, juw sʲaltəs xasapsaiŋ paːl kiːwərn: jiːwjopali saɣrime. saːnseːn pinime seːməl uj wiɣr uj, juːntəp pinime oːs tuw. taw uːnli, puŋke jeːmtəm eːlmxoːlasiɣ kaːtiɣ paːsəl; laɣləŋ supe jiːw. taw ta pormast wisane xot. anʲ jiːwjopali wiste, aːlməste noːŋxa, kona totaste. saɣrap wis, jiːwsup pinəs, jolapinəste, akʷ kaːt akʷ laɣl supiɣsaɣrapasaɣe. tuwl wiste, paːwlpors jolipaːlən woːŋxa xiləs, jolaraməste. tuwl minas, juwsʲaltəs akʷ ta xasapsaiŋ paːlən. anʲ seːməl uj wiɣr uj wiste, saːsən pinəste, saxi juːnti, uːlam juːnti. jeɣpiɣe joxtəs, eːl oːlmajassiɣ, eːl xuːlmajassiɣ. toːrəm moːt xoːtal waːri, jeɣpiɣe mini. seːməl uj wiɣr uj saːw suːmjax urəŋ paːlt woːrəŋ paːlt taɣintapti. tox taːl oːlssiɣ, tuw oːlssiɣ. akʷ mat eːrt eːkʷate piɣ onʲsʲas. janiɣmaneː xum eːriɣxum, mojtxum man xosa janiɣmi! xajtiɣtan janitiɣ jeːmtəs. ojkate woːrt jals i joxtəs juw. jun uːnli. nʲaːwram kon jonɣəsim jalasi. lʲusʲneːt sujti. lʲunʲsʲim juw sʲaltəs. kitiɣlite: „piɣkʷe, manəriɣ lʲunʲsʲeɣn?“ „aːsʲa“, laːwi, „kon akʷa sujti“, laːwi, „paːwlpors jolipaːlt, uːspors jolipaːlt. tox ti laːwi: «jiːwpopali paːl kaːte paːl laɣle saɣrupawes, paːwlpors uːspors jolipaːlt kaːtesaji, laɣle saji. mosʲneːkʷe jeɣpiɣketeːntəl oːleɣ. aːɣi osʲsiɣ, piɣ osʲsiɣ.»“ ojkate oːs woːrən minas. xosa xoːtal waːtʲi xoːtal jaləs, joxtəs. jun uːnli, teːɣ, aji. piɣrisʲ kon jonɣasi, lʲusʲneːt sujti. juw sʲaltəs. aːsʲeːn kitiɣlawe: „piɣkʷe, manəriɣ lʲunʲsʲeɣn?“ sʲaːnʲeːn tujawe: „piɣkʷe, ul potərten aːsʲən!“ aːsʲeːn marlawe. laːws: „kon paːwlpors uːspors jolipaːlt roːŋxi akʷ matər.“ „naŋ, piɣkʷe, laːwen aːnəm, taw xum mus roːŋxi!“ „aːsʲa, ti sʲirəl ti roːŋxi: «paːwlpors uːspors jolipaːlt jiːwjopali, kaːtəm sais, laɣləm sais. mosʲneːkʷe jeɣpiɣketeːntəl aːɣi osʲsiɣ, piɣ osʲsiɣ.»“ anʲ ojka tumajti: „xum mus urəl am piɣm tox potərti?“ nomsi: „xuːrmit peːramanʲ oːs uːreɣm.“ xujas, luːts. toːrəm xoːtəls. teːs ais, masxats, kona kʷaːls, kol sisən minas, nʲaːle jowte wis, josaɣe wotintəs, minas seːməl uj wiɣr uj aluŋkʷe. xosa xoːtal waːtʲi xoːtal joːmiɣts. toːrəm taweːn manər mis, ta i alas. juː minas. juw joxtəs, nʲaːle jowte sʲoːpitasane, juw sʲaltəs. juw sʲaltneːte mus piɣrisʲ kon kʷaːls: „aːsʲa!“ laːwi, „am jonɣeɣm.“ „piɣkʷe, jonɣen!“ laːwi. juwsʲaltəs. juw tuːp sʲaltəs, aːŋxʷsalaxtəs, joluːntəs. piɣrəsʲ kon lʲusʲneːt sujti. sʲaːnʲe lʲawti: „am muːnttaɣl laːweɣm, naŋ manəriɣ kona kʷaːleɣn. aːsʲən joxti, matər xuːleɣn, ul potərtən!“ piɣrəsʲ juwsʲaltəs. aːsʲeːn kitiɣlawe: „manər waːsən, manər sussən, laːwen aːnəmn!“ „aːsʲ, kon sujti akʷa xuːrmit peːramanʲ tij. tox laːwi: «jiːwjopali paːl kaːte paːl laɣle saɣrapaweːst. paːwlpors jolipaːlt, uːspors jolipaːlt ramwəs mosʲneːn. kaːte sais, laɣle sais. mosʲneːkʷ jeɣpiɣketeːntəl aːɣi osʲsiɣ, piɣ osʲsiɣ. am jiːwjopali kaːtiɣ paːsəl eːlmxoːlasiɣ jeːmtalasəm, laɣlaɣm iŋ jiːwiɣ.»“ ojka tumajti, kantmuwes: „xum mus tarməl toxa? jiːwnəl eːlmxoːlas waːrsəm, am nomseɣm, jiːwnəl waːrəm eːləmxoːlasəmnəl aːɣi osʲsəm, piɣ osʲsəm.“ noŋxa lʲuːlʲəs. suntak jolawiste, paːliɣ puːnsəste, siraj wis. kiwtalp wis, kiwtxatuŋk pats. xosa kiwtəs, waːtʲi kiwtəs, tuwluːlt pintlite toːwəlʲn: ta keːməl kiwtme, toːwlʲ punət pusən xuːratawet. noŋxa lʲuːlʲəs, paːlən paɣ minas, anʲ eːkʷate puwəste. „xonal tajəx“, laːwi, „toːrəm puːnsi eːlmxoːlas jisəŋ toːrəm, jeɣaːɣinʲsʲ oːlne neː, jeɣpiɣinʲsʲ oːlne xum kʷaːssiɣ tox ul wos oːleɣ neːɣəɣ xumiɣ. toːrəm ta sʲirəl ul wos laːwi!“ puwəste, kolkanən pinəste, paːl kaːte, paːl laɣle saɣraps. tuwl janiteːtəl pulʲiɣ saɣrəste. masxats, pinxats, piɣrisʲe wis. seːr mur wor saːmən joːmməts woːrən. tumajti, potərti: „neː minam neːŋəŋ saːm kinseɣm, xum minam xumiŋ saːm kinseɣm.“ toːrəm jeːmtəs tujjiɣ. anʲ neː pulʲiɣsaɣruwəs, luwane nʲowlʲane sajssət. tuwl teːls porɣiɣ. woːrtoːlnut joxtəs, konəl juwsʲaltəs, anʲ poriɣ juwwaːtəste. minas seːr mur wor saːmən. xaslitawri, seːɣitawri parəŋ saw xansa waːri. aːɣi osʲən piɣ osʲən pora jeːmtəs. onʲsʲas kit woːrtoːlnut nʲaːwramakʷeɣ, tuwl oːs akʷ onʲsʲas: eːlmxoːlas aːɣi. numitoːrəm teːltəs pilsaw, paːkʷsaw. pil ati, paːkw ati, waːtəltijane. woːrtoːlnut nʲaːwramiɣ wojantaxteɣ, eːlmxoːlas aːɣi teːŋkʷe at taːratiteːn. sitam xalt raːtiteːn. sʲaːnʲeːn laːwi: „manəriɣ wojantaxtijən? | eːlmxoːlas aːɣikem ul sawateːlən! | xonal tajəx numitoːrəm aːsʲuw | saːŋki uːsnaŋ muːnʲmaŋ uːsnaŋ xosa tuw xoli, | aːsʲuw puːnsi aːmplaɣl ujlaɣl xarəs takʷs. | eːlmxoːlas saɣrəm kasajxilʲəŋ narəŋ uːntmitən, | saɣrapxilʲəŋ narəŋ uːntmitən | maːŋki tajəx joxtew, | uːsəmoːtər ojka piɣ | aːmplaɣl ujlaɣl xars takʷs juw woːrən. | maːŋki tax ta porat | maːpeːr peːrəŋ kol, | maːsʲurp sʲurəŋ kol waːrew, | uːsəmoːtər ojka xaːrpaːsiɣ janiɣ luːŋin | maːŋki xorəmtawew.“ | aːɣite laːwəste xansaŋ saːs xansuŋkʷe. taːn anʲ kolanəlt xujeɣt. sipe jaktim puŋke jaktim taːrəŋ uːləm xujeɣt. akʷ pal kaːtlate xartəste, joləl nortəste: | satloːmtup loːmtəŋ osma. | akʷ pal kaːtlate oːs xartəste, | numəl uːlt xartəste: | puŋke jakttaːl jalpəŋ xoːrnʲi. | xujeɣt. tox xujneːnəl xalt | akʷ mat eːrt xowtjiw oːlne aɣʷmaŋ tow | xum mus toːlmatəs. | tuwl uːsəmoːtər ojka piɣ osʲne | xaːrpaːsiɣ janiɣ luːŋi | wowwowəŋ jomas turəl lʲuːlʲi, | lʲaŋlʲaŋəŋ jomas turəl lʲuːlʲi. | anʲ maːpeːrp peːrəŋ kol, | maːsʲurp sʲurəŋ kol | xowtjiw oːlne waːɣəŋ naːrap, | naːŋkjiw oːlne waːɣəŋ naːrap naːraptawes. | anʲ kolala paːliɣ kaːralawəs sajt juːmaɣwəs. „aːɣikʷe“, laːwi, „naŋ xansaŋ saːsən kaːtaɣn numpaːlən jiːwn tumaːɣeːlən, tuwl kaːtaɣn joləl puweɣn; jiːw wos xartawe, naŋ xot ul taːrataxten!“ xartwes. owleːt neɣləs xansaŋ saːs. mosʲ oːs xartəste: eːlmxoːləs kaːtiɣ neɣləsiɣ. tuwl janiteːtəl konaxartwes. tuwl sown maːnʲiɣtawes. anʲ taijane waːɣlttaŋkʷe patweːst. waːɣlttuweːst. neːuj ke oːls, | nʲila keŋne towləsʲ aːŋxʷəs, | xumuj ke oːls, | at keŋne oːs towləsʲ aːxʷwəs. | nʲilatoːspa toːsəŋ aːpan xujptaweːst, | attoːspa toːsəŋ aːpan xujptaweːst. | sunən taːlttuweːst. eːlmxoːlasaːɣi jaːnəs sunən taːlttuwəs. xosa totweːst, waːtʲi totweːst, | uːsəmoːtər ojka paːwln neɣləst. | neːuj ke oːls, | nʲila roŋxe towləsʲ roːŋxwəs, | xumuj ke oːls, | at roŋxe towləsʲ roːŋxwəs. | eːlmxoːlas osʲne | tulpuŋki sipəŋ kol, tulpuŋki maŋnəŋ kol | aːwisuntən joxtəst. | tujtjoniɣ jonɣawe, | rakʷjoniɣ jonɣawe. | eːtʲisoːs kusʲnaŋ kaːtəl, | xolisoːs kusʲnaŋ kaːtəl tuːlawe juw. | luntlaɣl waːslaɣl talkʷa pasanən uːnttuweːst, | wiɣr jaːrmak, wiɣr nuj pitʲin uːnttuweːst. | tuːrteːp saːw saːnəl, | aːsteːp saːw saːnəl sʲunʲiltawet. | pupiɣ saːsam xuːrəm eːt, | toːrəm laːwm nʲila eːt jonɣawet. | sisxinʲsʲər saːw xum sʲalti. | attaːnp taːnəŋ jiːw | uːsəmoːtər ojka kaːtən wiɣte. | joliowl taːne tʲeːŋlalti, | xotalʲ oːlne towləŋ toːrəm | pusən kaːstijane, | numiowl taːne tʲeːŋlalti, | xotalʲ oːlne laɣləŋ toːrəm | pusən kaːstijane. | anʲ toːrəm laːwm nʲila eːt parəs, | pupiɣ laːwm at eːt parəs. | anʲ eːlmxoːlas aːɣi, eːtʲjiɣ jeːmtəs, talkʷ osma pini, karssiɣ jeːmti, kars osma pini, talkʷaɣ jeːmti. uːlme at juwe, kona kʷaːləs. kola;at sujteɣt, laːwi: „ti kaːtəm aɣməŋ.“ akʷa sujti, laːwi: „eːlmxoːlas aːɣikew matər ti waːrs.“ taw sʲaltəs juw. moːl xoːtlan majluwəs woːrtoːlnut aːpsʲite pormasəl, taw joːxtlattaːl xuːriɣpattat onʲsʲəste. wiste, kona kʷaːləs, kolalon sʲeːltəmtaste. tuwl kolalat numən potərti, laːwi: „xolit eːt tujt posʲɣən lʲoːŋxpattat maːn tax tot sumlew.“ tox potərtawəs, juw sʲaltəs. xujas, toːrəm xoːtlaːləs, eːtʲiməs. oːs talkʷ osma pini, karssiɣ jeːmti, kars osma pini, talkʷaɣ jeːmti. kona kʷaːls, xuːntli: tujt posʲɣəne lʲoːŋxpattat sujteɣt. akʷa sujti: „ti sʲaŋkəm aːtʲim.“ akʷanəl sujti: „anʲ eːlmxoːlas aːɣikew maːn pormasuwnəl matər ti waːrs.“ juw sʲaltəs. at joːxtlattaːl xuːriɣpattanəl wisane, kona kʷaːls. anʲ tujt posʲɣən lʲoːŋxpattan tuw ta lisane. sujti, laːwi: „ti eːlmxoːlas aːɣikʷe! xolitan eːtʲi eːkʷat ulʲjiw totne lʲoːŋxpattat tuwl xuːntlen, maːn tax tot sumlew.“ tuwl juwsʲaltəs, jolxujas. toːrəm xoːtləs. xoːtale oːls, eːtʲjiɣ jeːmtəs. jola xujas, talkʷ osma pini, oːs karssiɣ jeːmti, kars osma pini, talkwaɣ jeːmti. kona kwaːls, xuːntli: eːkwat ulʲjiw totne lʲoːoxpattat sujteɣt. minas tuw. sʲaːnʲanəl sujti: „aːɣikwe, ti sʲaŋkʷəm aɣməŋ, naŋ moːl xoːtal matər ti waːrssən“, laːwi. tau minas juw, juw sʲaltəs. at joːxtlattaːl xuːriɣpattat onʲsʲəm keːm utane wisane pusən, kona kwaːls, minas tuw. ulʲjiw totne lʲoːoxpattan joxtəs. tit onʲsʲəm utane tuw sʲeːltəmtəs. „ti aːɣikʷe“, laːwi, „naŋən janmaltasləm, onʲsʲasləm, aːnəm jomasʲakʷ sʲoːpitaslən. oːs jomas uːləm oːlen!“ laːwi. „xolit eːt“, laːwi, „toːrəm eːtʲimi, kona kʷaːlen, numitoːrəm aːsʲən nuːpəl sunsen! numən manax saːt posəŋ sow oːli, naŋ lowinteːn! xotipal jeːrt xuːrəm posəŋ sow lʲuːlʲeɣt, naŋ laːwen, maːn toːrəmn tuw noːŋx ta keːlajasuw!“ juː minas, jola xujas. toːrəm xoːtləs. xoːtal oːləs. eːtʲjiɣ jeːmtəs. kona kʷaːls, noːŋxalʲ sunsi; toːrəmt manax saːt sow, lowintaŋkʷe patsane. xuːrəm jilʲpi sow arɣeːn teːlmət. tuwl i lʲaːɣaləs: „sʲaːnʲəm, aːpsʲijaɣm tuw ta poːssət.“ pojksʲəs, juw sʲaltəs, eːl oːlmais, eːl xuːlmais. anʲ ta xuːli, anʲ ta sʲunʲi. |