| sujpil lupta paŋxwit josaŋ xum (mojt) |
ti potər anum stepan nikolajevič anʲamow taw potərtas. ti potər – mojt. stepan janiɣmame porat ti mojt janiɣ maxmətəl xuləɣlas. stepan nikolajevič taw keraskoləŋʲa pawləl oli.
akw manʲsʲi ojka wort jomimate manʲ lʲoŋxət kasalas. ta sunsəɣlijane, nomsi: «amanər minas?» lʲoŋxət xotjut josal jomum, nas takem ti lʲoŋxane manʲit. nomsi: «sar jujil kojiɣlilum». jujil ta minite, akwmat jujil joxtəste: takem manʲ ojkarisʲ jomi, nox entxatam, nʲaral lutəl oli. manʲsʲi ojka ta josaŋ xum kitəɣlite: «naŋ xotjut?» «am ojka. tit xosat oleɣum. anʲ juw mineɣum».
takwi taj, sujpil lupta paŋxwit josaŋ xum. entapet leŋnət xaneɣət, sʲar elmxolas xolʲt potərti. nas takwi taj takem ti manʲ, josaɣe sujpil lupta paŋxwitəɣ. xuməɣ itʲimlaneɣ ta jomsəɣ. manʲ ojkarisʲ elit jomi, takem ti pelp. «turmanlan elipalt sar jol pojtimen» – xalent potərteɣ. ulʲuw ta sarteɣ, tuwəl kasəŋ xum takwinaten talkan warəs. sujpil lupta paŋxwit josaŋ xumite sʲaj ajs, jol ta xujas. akwate (manʲsʲi ojka, karəs ojka) os jol ta xujas. karəs ojka itʲi nomsi: «am sar tikem ojkarisʲ ulʲan wusʲkasilum, nʲoxsane xot almaijanum».
nox kwaləs, akwta manʲ ojkarisʲe ulʲan ta liste, takwi os jol ta xujas. nomsi: «anʲ taj ta sʲarasawes.» itʲi ulʲate nox paltunkw kwaləs, sunsi: manʲ ojkarisʲe akwta sʲirəl os xuji. os ta ulʲan wusʲkasaste, takwi jol ta xujas. alpəl akw ta ojkarisʲen nox ti kwalttawe, lawi: «nox kwalen, sʲaj ajen». nox ta kwaləs, takwi nomsi: «am tawe ulʲan lislum, a taw akwta xuritetəl oli». janiɣ ojkate ta nomsaxti. sʲaj ajsəɣ, astəsəɣ kittəɣ ta minasəɣ.
manʲsʲi janiɣ ojkate nomsi: «sar am tawe jujil os nʲawlilum, takem manʲ ojkarisʲ, xotalʲ mini?» jujil ta minite, sunsi: akwmat kol unli, ta manʲ ojkarisʲ josaɣe kol awi sunta lʲuleɣ. kol alan nox xaŋxəs, sʲowal suntnəl jolalʲ xuntli. sujpil lupta paŋxwit josaŋ xumite sʲane nupəl potərti:«am akw ojka jot wort xulsum. anum manax sʲos ulʲan wusʲkasaləste». sʲane lawi: «taw alam sʲowal suntnəl anʲ xuntli». tuwəl ojka nupəl ekwa lawi: «naŋ am piɣrisʲum ulʲan manriɣ paxwtilən? anʲ naŋki kolən xot sʲarasawe, tuwəl nematər wossəɣ at aleɣən». ojka anʲ xot roxtəs, ta ojas.
ti manʲ ojkarisʲ taj ekʷa piɣrisʲ taw. sujpil lupta karsit xum – ekʷa piɣrisʲ tam xuril warxatas. |
