ekʷa piɣrisʲ akʷental oleəɣ. apɣe lawi: –am usaŋ oter ojka wat wetra posne mis uruŋkʷe metalaxteɣum. akʷ lawi: –tax tit at oli, jomas nʲaulenen juw oji. takʷi pawlen oji. –atʲi, taw, lawi, at oji. usaŋ oter ojka ajaŋ xum piɣən ti totwes anʲ mis. lawi: –ureln! –urilum, lawi. –jomasakʷe poseln! –am, lawi, poseɣum, am mis posuŋkʷe xaseɣum. ta xuməɣ luw sisen talsəɣ, teŋki pawlen ta minasəɣ. ekʷa piɣrisʲ mis leɣe saran oːŋxəl sarteste, tuwl kat ulta mis leɣe pereste, kataɣe tuw xanujassəɣ. wasəɣ xot at seteəɣ. anʲ mis ta sulinti usəŋ oter ojka pawlen.
ekʷa piɣrisʲ ta totawe mis leɣet. mis jorəɣ jemtalan porat, usəŋ oter ojka pawl ala ti nejli, ekʷa piɣrisʲ jorəɣ jemtalan (jemtalanete) porat ekʷa piɣrisʲ mis kotʲle pasnəl takʷi kole kiwərna xartiɣlite. ekʷa piɣrisʲ ta xartəs, ta xartəs, tox kolen juw xartəste. juw xartəste, sʲama junitaste. akʷe lawi: ”manrəɣ alaslen matum mat mis. nematər at onʲsʲeɣən, tuwəl manər miɣlen. ekʷa piɣrisʲ at sujtəɣli. usəŋ oter ojka met xuməɣ joxtesiɣ. – ja, ekʷa piɣrisʲ, mis sʲakwit oːnʲsʲeɣən? sʲakwit posʲka iŋt taɣənti, taɣle pinilum, lap ratilum. usʲ totelen. met xuməɣ ta minasəɣ. usaŋ oter ojka lawi: – manrəɣ sʲakwit at totsen? laweəɣ: –posʲka lap iŋt ratawe. ekʷa piɣrisʲ janəɣ kutʲu ojka sise pajpəl neɣiste. pajp kiwerna akʷ nʲaːr nʲoxs sow maɣəste, akʷ nʲar leŋən sow maɣəste, akʷ nʲaːr sʲolsʲi sow pinaste. kutuw ojkate elanuw totaste, (pumən neɣəste). usaŋ oter ojka met xuməɣ ta joxtesəɣ. sʲakwit nupəl wasəɣ telaten atʲi. anʲ eːkʷa piɣrisʲ lawi: –am woːr xumim iŋt ti joxti. ta porat kutu ojka kol awi sunten ta joxtapas. awi punsitalas, juw ta tarmataste. usaŋ oter ojka met xuməɣ laweəɣ: –texam, kutʲu woraji. –ekʷa piɣrisʲ lawi: – ta kos lʲulʲ, akʷ nʲoxəs, akʷ leɣən, akʷ sʲolsʲi. alamutane ti. usaŋ oter ojka met xuməɣ laweəɣ: –kutʲuwən menamen tinaleln? –atʲi, at tinalilum. –atʲi, naŋ tinaleln! –kit luw maɣəs, lawi, miɣlum. kit luw maɣəs ta tinalaste. anʲ usaŋ oter ojka met xuməɣna kutʲuwe ta totwes. xuməɣ minam juji palt ekʷa piɣrisʲ luwəɣ sʲama alasaɣe. anʲ usaŋ oter ojka met xuməɣ juw joxtasəɣ. anʲ kutʲuwen pajpəl xuntmalʲtasten, worna mosʲ elnuw ta totasten. ja pirr nʲoxsəŋ wor tuwle ta!
kutʲuwen juwle aŋkʷatalim ta xajtəs. ten juw ta minasəɣ. juw sʲaltasəɣ. konn ta kutʲuwət ta parxatuŋkʷe patsət. kona kʷalsəɣ, pawl taɣəl kutʲuwen pajpe poliɣ maniɣtim, os mot pajpəl xuntmalʲtasten. torɣent xosan totilamen, waseɣ juw at juw, tax. xosan totasten, ta taratasten. ja pirr, ekʷa piɣrisʲ kutʲu, nʲoxsaŋ wor tuwle ta. os juw ta minasəɣ. juw sʲaltasəɣ, os ta kutʲuwət purxatuŋkʷe patset. kona kʷalsəɣ, kutʲuwen sʲama purime. ekʷa piɣrisʲ taw wos oli, arɣen lapilaxti! ekʷa piɣrisʲ luw tur kelpəl pinaste. akʷ turen tuw neɣəste. usaŋ oter ojka met xuməɣ ta joxtesəɣ. anʲ ekʷa kol kant unli. ekʷa piɣrisʲ akʷ nupəl lawi: –akʷ, sʲaj pajten! ekʷa unli. ekʷa piɣrisʲ os lawi: –akʷ, sʲaj pajten! ekʷa sʲaj at pajti, unli. manʲ sʲoxri sup ta almajaste, akʷe tur ta jaktapaste. luw tur. ekʷa ta raɣatas. usaŋ oter ojka met xuməɣ ten xalent laweəɣ: –texam, anʲ ekʷa ti alwes! ekʷa piɣrisʲ mosʲ unləs, sʲoxri supe paxwtasʲlite. –liliŋ ker sʲoxrikem, manər alaslum, jaltapteln! ekʷa noŋx untəs. usaŋ oter ojka met xuməɣ teŋki xalent poterteəɣ. –ekʷaɣamen saka lʲawteəɣ (ojkaɣen nupəl). men nuplamen saka lʲawteəɣ. ekʷa piɣrisʲ apəɣ, sʲoxrin tinaleln! –atʲi, lawi, at tinalilum. akum, lawi, saka janɣəɣ jemtəs. kelpe tarataleɣum, kopnitaɣ jemtali. usaŋ oter ojka met xuməɣ laweəɣ: –ja, tinaleln, apəɣ. – lawi –kit luw maɣəs tinalilum. ta tinalaste. sʲoxri supen ta wisəɣ, laɣələl ta jomantasəɣ. juw joxtasəɣ, ekʷanen ta lʲawteəɣ: – ekʷa piɣrisʲ sat pisʲ xoti xotal marlilen? anʲ ekʷa turaɣen ekʷa piɣrisʲ sʲoxri supəl jaktapawesəɣ. anʲ ekʷaəɣ ta raɣatasəɣ. sʲoxriten ta kos paxwteəɣ: –matarəɣ alam najaɣən jaltaptejn! ta kos paxwtasəɣ, nas worna tatsəɣ, anʲ ekʷaəɣ worna totwesəɣ. usaŋ oter ojka met xuməɣ laweəɣ: –ja, minimen, ekʷa piɣrisʲ alilamen. ta minasəɣ. juw joxtasəɣ, ekʷa takket oli. akʷ pal torəl lap taɣatime. laweəɣ: –akʷ, ta palt xotʲut oli? –ta, lawi, aɣəm oli. ta minasəɣ anʲ xuməɣ. ten minamen juji palt nematər xosa ti akʷ xum tiɣ joxtəs. xajtali. anʲ ekʷa lawi: –amkem at məɣlum, apɣəm atʲim. ja taw ti xajtalas, xajtalas, ekʷa aɣite ta miste. ta totwes. totwes, tuwəl takket kolt oli. tujijiɣ jemtas, takket kolt oli. usaŋ oter ojka aɣəjəɣ laweəɣ: –puwluŋkʷe jalew! manʲ tur woŋxan minasət. usaŋ oter ojka puwluŋkʷe ta waɣlesəɣ. taw at waɣli. ten laweəɣ: –naŋ os waɣlen! lawi: –nen jol ta sʲaltapalen, am tax waɣleɣum. ten jol ta sʲaltapasəɣ. taw ta komt ta waɣlapas. maːnʲ sort pəɣ xuril ela ujməɣtas. tur mot owlt kʷalapas, ekʷa piɣrisʲiɣ juw ta xajtas. juw joxtəs, ta oli. takʷsə jaŋk polʲas. waŋən sun taltas, ta xarti. usaŋ oter ojka puwlə pawl nejləs, kutʲuwət xorteɣt. nʲawramət laweɣt: –ekʷa piɣrisʲ nʲusmuw ti juw. pawln joxtəs. usaŋ oter ojka kon joməɣti. ekʷa piɣrisʲ lawi: –manʲin, lawi, jun oli? jatel nusam xot olem manʲem? pawlaŋkʷe totwes, akʷaəɣ. a usaŋ oter ojka aɣijəɣn ekʷa piɣrisʲ xanʲsawe, taw ti osʲmarli. ekʷa piɣrisʲ nomsi: ulʲiwen wos minnuwəɣ. anʲ aɣəjiɣ ulʲiwen ta minesəɣ. ekʷa piɣrisʲ jujil nawluwesəɣ, eŋan pattaten noŋk taɣmatsəɣ, tot ta xaneəɣ. –anum manrəɣ xansilen! usaŋ oter ojka nʲajt xum kinsi. nʲajt, lawi, xot xonteɣum? ekʷa piɣrisʲ lawi: –paŋx tene xum pəɣ oli. ekʷa piɣrisʲ nʲusme lawi: –naŋ ti jalijn! ekʷa piɣrisʲ jalas, totaste. anʲ paŋx pot naluw taɣatim pajtaxti. taw kaji. tuwl paŋx teɣ. ekʷa piɣrisʲ sat pisʲen tuw ti man xon. ekʷa piɣrisʲ nomsi: –ja tiws, ti xontawem tax, mana pisʲum artmi? ekʷa piɣrisʲ mir xalnəl kona kʷalapas, kol soxripet joxul kossum unli. pawl janitn ta rawtite, pawl taɣəl kutʲuwt ta poːxtasət, ta purxateɣet xalanelt. ekʷa piɣrisʲ juw ajnatas. manər kajijin, kon xont joxtəs! anʲ mir pusən kona kʷalapasət. taw ta koːmt juw sʲaltapas. paŋx tene xum pəɣe paŋx pajtne poten tuw puwtmaste. konalʲ roŋxi: –manər kutʲu purxatne maɣəs manər kon kinsijen? anʲ xum poten ti pats. taw jola poniɣti ertam noŋx xartite. noŋx wisanəl – samaɣe kon raɣatamaəɣ. wasəɣ xumle warijanel. soram ti pats. usaŋ oter ojka lawi: – ekʷa piɣrisʲ nʲusm, naŋ ti totilen, matər met woweɣən. –ulʲatal osʲne aɣən məɣlən ke, totilum, lawi. –maɣlm, usaŋ oter ojka lawi, naŋ wos totaslən. –am, lawi, totilum. man waŋən sunen ta pinaste, ta xarti. akʷ mat kit mis xum nʲaləl jowtəl noxəs paxwteəɣ. xumiɣ, lawi, nʲal təɣli ul lajen, am ajim xum toteɣum. ten at xonteəɣ. akʷ nʲal jis, sun poːxan ti pelxatas. taw nʲal almajaste, anʲ sunt xujne xumite wilʲt jaten tuwle leŋtasaste. –anʲ munt taɣəl laweɣum, manriɣ təɣle paxwtijin. anʲ ajim xumim wilʲt jat ta patwes. anʲ xuməɣ təɣ jisəɣ– solʲ wilʲt jaten nʲal pelxatam, tot lʲuli. –anʲ, lawi, am wasəɣ at totilum, ekʷa piɣrisʲ lawi. anʲ nen totelen! –ta janit jomas waren, naŋ toteln, ekʷa piɣrisʲ! takʷsi palit alam nʲoxsanamen pusen naŋen məɣanamen. os manʲ jaɣaɣimen miɣmen. ta janit jomas waren, toten! –neːn tup ul laplaxten! –men laplaxtikemen naŋənnəl xot ojapimen? ekʷa piɣrisʲ os ta xarti. paŋx tene ekʷaəɣ oːkaəɣ palt joxtəs. –akʷjeɣum akʷaɣum, awin paləɣ punselen! sunəŋ taɣəl kol kiwerna juw narumtaste. –nenan alne kulʲ ti joxtəs, saɣrilen, saɣrilen! anʲ ekʷaəɣ ojkaəɣ pəɣen kit manəl supəɣ saɣresten. ekʷa piɣrisʲ kon roŋxi: –ti manər warijen! pəɣən, am anʲ munt taɣəl laweɣum, ajim. ekʷa piɣrisʲ ker taːxit xuril təɣlamlas. paŋx tene ojka ker xortxan xuril nʲawlxati. ekʷa piɣrisʲ ti joxtawe, ti manarawe. akʷ mat manʲ jakʷen joxtəs. ekʷa piɣrisʲ lawi: –am erɣum ke ela mini, am mojtum ke ela mini, jaŋk tara osʲa juntup xuril wos wos sʲalataleɣum, lawi. osʲa juntup xuril jaŋk tara ta minas. maːnʲ sort xuril jolən ta jalasi. akʷ mat takʷi janit maːnʲ sort pəɣ xontas. –naŋ, lawi, xotal mineɣən? maːnʲ sort pəɣ lawi: –lunan wit usi, liliŋ witen alɣal mineɣum. –toxaŋk, akʷ jot minimen. ta minasəɣ akʷ jot. minasəɣ, minasəɣ, anʲ ja paŋx tene ojkan ker arpil warime, ker kamkal untime. manʲ sort pəɣ nupəl lawi: –naŋ kamkan sʲalten, kamka noŋx wiwe, am, lawi, ta komt alɣalʲ mineɣum. manʲ sort pəɣe kamkan sʲaltəs, kamka noŋxa at almawe (tame wawe). taw iŋt sʲalti. tona at almawe, wit osaŋkʷe ti pats. juji owlt ti sʲaltəs. kamka noŋx ti almawes. noŋx patsiɣ, manʲ sort pəɣrəsʲ ta poliwjawes, taw (ekʷa piɣrisʲ) iŋ saŋxwxati. ja, paŋx tene ojka ekʷate nupəl lawi, ekʷa takəsʲ puweln! am muwrəl sʲama juniɣtilum. ekʷaten ta puwwəs. taw muwər wis. taw juniɣtame porat mot nupəl permtaxtas, ekʷate kat supəɣ junitaste. ekʷate lawi: –ojka, naŋ puweln! ojkaten ta puwwes. ekʷa junəɣtas, mot nupəl permtaxtas. ojkate kat supəɣ juniɣtaste, akʷ katanen sas supəɣ junəɣtasanen. ojka lawi: –tarməl xujeln, am pus katumtəl jomasʲakʷe junɣtilum. anʲ ekʷan tarməl xujwes, (anʲ) ojka ta juniɣtas. ekʷa piɣrisʲ xot permtaxtas, anʲ ekʷa puŋke ojkaten sʲama junəɣtawes. anʲ ekʷa piɣrisʲ kʷalapas. anʲ pan tene ojka ekʷa piɣrisʲen muwrəl sʲama ta ratwes. anʲ ekʷa piɣrisʲ ta minas. kit mis xum palt joxtəs. noxsət sunən taltimet. jaɣaːɣiten sʲopitamten. anʲ ekʷa piɣrisʲen neəɣ ta totwəs nʲoxsən lutəŋ taɣəl. anʲ usaŋ otər ojka pawln ta joxtasəɣ. anʲ maɣi tan joxtnete kastəl aɣite sʲopitamte. kit ne ta totes takʷi pawlen. joxtmete akʷe akʷ ula sultme arəɣtam. taw noŋx xaŋxəɣtas, sʲowal sunte tujtəl lap xarumtaste. akʷ lawi: –ja, apɣum sam sunsum ulʲa lap ta xariɣtawes! –akʷ, am,– lawi. –akʷe kon ti worati, takeːm ti matum. apɣe palt aniɣlaxtaŋkʷe minas. apɣen almuwes, ta laɣələl saŋxasawes.
xosan minas, pawl patran (at nanki) mus minas. juw nejəlmete manʲ aɣərisʲiɣ jemtam. ti akʷentəl anʲ ta sʲuneəɣ, anʲ ta oleəɣ. ta ojejpas. |
